Lirnghing tuarte chhanchhuah hna thawk chhunzawm zel

Turkey leh Syria rama Thawh­ṭannia magnitude 7.8-a naa lirnghingin chhiatna rapthlak tak a thlen tuartute chhanchhuah leh chhawm­dawl hna chu ngawrh taka thawh chhunzawm zel a ni.

Hetih lai hian in chim hnuaia tangte nungdama chhanchhuah beiseina a tlem ṭan a, thi zat pawh hi an la punchhoh zel rin a ni. Mi thiamte chuan in chim hnuaiah hian kar khat chhungte nungdamin an awm thei tih sawi mah se, khaw vawt lutuk avangin an dinhmun hi a ṭha lo hle.

Nimin tlai thleng khan ram pahniha lirnghingin chhiatna a thlena thi zat report hi 21,000 an chuang tawh. Turkey-ah mi 18,342 leh Syria ramah 3,377 an thi tawh. Hliam tuar mi sing tel an awm bawk.

Turkey sorkarin a tarlan danin, lirnghing hian an rama province 10-ah building 6,444 vel a sawichim a ni. In chim hnuaiah hian mi sang tel an la tang nia rin a ni bawk. President Recep Tayyip Erdogan chuan lirnghingin in a sawichimte hi kum khat chhunga sak ṭhat leh vek an nih tur thu a sawi.

World Bank chuan Turkey ram ṭanpuina tur hian USD tld 1.78 pek a tiam. United Nations secretary-general Antonio Guterres chuan ram hrang hrangte chu ṭanpuina pe turin a ngen a, karlehah UN hian donor conference a buatsaih dawn tih a sawi bawk.

Syria rama chhawmdawl hna thawktu, World Food Programme (WFP) chuan stock-te a zo tawh tih sawiin, Syria leh Turkey inkal­pawhna kawng tam zawk hawng turin a ngen.

United Nations hian ram pahnihte inkalpawhna tur, border crossing hi pakhat chauh hawn a phalsak a ni.