France-in Vladimir Putin hnena chawimawina hlan hlihsak tum

France president Emmanuel Macron chuan Russia president Vladimir Putin hnena France ram chawi­mawina sang a lo hlan tawh chu hlihsak leh dan a ngaihtuah mek tih a sawi.

Kum 2006 khan France president hlui Jacques Chirac chuan Russia President Putin hnenah hian chawi­mawina sang, Legion d'Honneur a lo hlan tawh a ni. Hei hi military leh civil lamah pawh France ramin chawimawina a pek san ber niin, kum 1802-a Napoleon Bonaparte-a'n a lo siam tawh a ni.

President Macron chuan Putin-a chawimawina pek tawh hi a hun taka hlih hun a nghak mek tih a sawi.

Putin hnena chawimawina pek a nih lai hian France leh Russia ram hian inlaichinna ṭha tak a nei. Mahse nikuma Russia-in Ukraine ram a run hnuah, European Union nena an inkar boruak a chhe chho hle a, France nena an inzawmna thlengin a nghawng a ni. France President hian Russia ram demna thu pawh a sawi a, Ukraine nena inkahhai an puan leh, inremna kawng zawnga inbiakna an neih theihna turin telephone hmangin Putin pawh hi a be fo a ni.

France chawimawina sang hi Syria president Bashar al-Assad hnenah kum 2001 khan hlan a lo ni tawh bawk a, mahse kum 2018 khan award hi pe kir lehin, US chhiahhlawh France hnen aṭanga chawimawina pek chu a kawl zui duh lo tih a sawi.