Turkey-Syria lirnghing vanga thi mi 50,000 an tlin chhoh a rinawm : UN

United Natoins relief chief Martin Griffiths chuan Turkey leh Syria rama lirnghing vanga thi chu mi 50,000 chuang an tlin chhoh a rinawm thu a sawi.

Ram pahnihah hian lirnghing vanga thi report hi 28,000 an tling tawh a, mahse in chimin a delh, chin hriat lohin mi tam tak an la awm. Griffith chuan lirnghinga vanga thi zat hi tuna an report let hi a la tlin chhoh a rinawm thu a sawi a ni.

Official-a tarlan danin, nimin thleng khan lirnging vanga thi hi Turkey ramah mi 24,617 awm tawhin, Syria ramah 3,574, an vaiin 28,191 an awm tawh.

United Nations chuan ram pahnihah hian hmanhmawh taka ṭanpui ngai mi nuai 8.7 vel an awm mek tih sawiin, Syria ram bikah chenna nei loin mi maktaduai 5.3 an awm phah thei dawn niin a tarlang.

World Health Organisation (WHO) chuan lirnghing hian ram pahniha cheng mi maktaduai 26 dawn a nghawng tih sawiin, harsatna tawk mekte ṭanpuina turin hmanhmawh takin USD mtd 42.8 mamawh a nih thu a sawi.

WHO hotu Tedros Adhanom Ghebreysus chuan Inrinni khan Syria rama lirnghinna hmun, Aleppo khua a tlawh.

Turkey-in in satu 113-te manna tur thupek tichhuak

Turkey rama lirnghingin in tam tak a sawichhiat hnuah, official-te chuan in satu 113-te manna thupek a tichhuak. Police-te chuan mi 12 man tawhin, an zingah hian building contractor-te pawh an tel.

Expert-te chuan tun hma aṭangin eirukna leh sorkar policy mumal tawk loh avangin Turkey rama in sakte chu a ṭha loin a him tawk lo tih an lo sawi fo tawh a ni.

Tun ṭum lirnghingah khan in sang tel tluin mi tam takin anthih phah a, hei vang hian lirnghing vanga chhiatna thleng chu in sak dan dik tawk loh vangin a nasa zual ta niin an sawi.