Israel sorkar laka lungawi lohna lantir chhunzawm

Israel prime minister Benjamin Netanyahu kaih­hruai sorkar thar duh lohna lantirin Inrinni khan Tel Aviv leh khawpui dangah mi tam tak an pungkhawm leh.

Sorkar tharin judicial system siam danglam a tumna hi hun rei tak duh lohna an lo lantir tawh a ni. He system thlak tumna hi Supreme Court thuneihna tihnep sak a, politician-te hnenah thuneihna sang zawk pek tumna niin an sawi.

Kar ruk chhung chu judicial system thlak tum duh lohna hi kartawpah lantir a ni tawh a, khawpui hrang hrangah kawng­zawhte huaihawt a ni. Inrinni liam ta khan a ṭum khatna atan Israel-in Palestinian rama luah, West Bank-a Efrat-ah pawh lungawi lohna hi lantir a ni ve bawk.

Hetih lai hian judicial system thlak danglam rawtna hi vawiinah parliament, Knesset-ah pulutin vote lak ṭum khatna neih tum a ni. Bill hi law-a chantir tur hian vote lak ṭum thum a paltlang a ngai dawn a, ṭangrual sorkar thar hian April thlaah pass hman a tum.

Channel 12 news-in mipui ngaihdan a lakah, Israel ram mipui hmun lia ṭhena hmun khat chauhin judicial system thlak tumna hi an thlawp a ni. Supreme Court President Esther Hayut leh Attorney General Gali Baharav-Miara-te pawh sorkar thiltih tum duh lohtu langsar zingah an tel.