Israel-in West Bank-a Juda-te chenna hmun 9 a pawm

Israel far-right sorkar cabinet chuan Palestinian ram a luah, West Bank-a hmun pakuaa chengte chu dan ang taka pawm an ni dawn tih a sawi. Palestinian Authority (PA) chuan hei hi sawisel nghalin, langsar taka an mi leh sate donaa an ngaih thu a sawi.

Cabinet meeting zawhah prime minister Benjamin Netanyahu-a'n thuchhuah a siamah, West Bank-a hmun pakuaah hian Juda mite chu hun rei tak an lo cheng tawh a, heng hmunte hi Israel sorkar aṭanga phalna la hmasa loa sak ni mah se, sorkar chuan dan hnuaiah a pawmsak tawh dawn a ni, a ti. In pawh eng emaw zat sak belh chhoh a ni dawn bawk.

Israel mi nuai 5 chuang zet chu Palestinian ram an luahsaka hmun 200 chuangah an khawsa mek a, international law hnuaiah an awmna hmunte hi dan loa din vek an ni.

Mahse Prime Minister thu­chhuah chuan, "Tun hnaia Jeru­salem-a Palestinian firfiakte pawikhawihna rapthlak tak thlen vangin, security cabinet chuan Juda leh Samaria-a hmun pakuaa chengte chu dan ang taka pawm a remti ta a ni," tiin, an chenna hmuna chenna in sak belh dan tur ngaihtuah turin civil administration higher planning committee pawh an ṭhukhawm thuai dawn tih a sawi nghal bawk.

Tun hnaiah East Jerusalem-ah Palestinian mite pawikhawihna ṭum hnih thleng vangin Israel mi 10 in nunna an chan a ni.