US-in an mi leh sate Russia ram chhuahsan turin hriattir

United States (US) chuan Russia rama an mi leh sa awmte Russai law enforcement agency-te man emaw, vau emaw an tawh a hlauhthawnawm thu sawiin, rang taka Russia ram chhuahsan turin a chah.

Moscow-a US emba­ssy chuan ngenna hi siamin, Russia-a US awm mekte chu a rang thei ang bera chhuak tura a ngen bakah, midangte pawh Russia ramah zin lo turin a chah bawk a ni. US hian Russia chhuahsan turin America mite chu a hma pawhin a lo hrilh fo tawh a, nikum September thlaa Russia president Vladimir Putin-a'n Ukraine nena an indo mekah an sipaite thuam chak a nih tur thu a puan hnu lawk pawh hian ngenna a lo tichhuak tawh bawk.

Embassy chuan, "Russia security service lamin US citizen-te chu thu dik tawk lo hmanga puhin an man fo a, US mite chu an bitum bik a ni. Man an nih hnuah an enkawl dante an tilang duh lo a, a rukin an thubuai ngaihtuahin finfiahna ṭha tak awm lo chungin thiam loh chantir an ni fo a ni," a ti. Hei vang hian US mi leh sate chu an himna tura Russia ram chhuahsan thuai turin a chah a ni.