US balloon vawi 10 chuang rawn thlawk lut tawh : China

US-in Chinese surveillance balloon nia a sawi, an ram chhunga thlawk lut a kahthlak sak hnuah, China chuan nimin khan January, 2022 thla aṭang khan US balloon hi an ram chhungah vawi 10 chuang zet a thlawk lut ve tawh bawk niin a sawi ve leh.

Tun thla tir lamah US-in China spycraft nia a sawi, an ram chhunga thlawk lut a kahthlak sak hnuah ram pahnihte inkar hi a chhe chho leh hle a ni. US leh Canada ramah a dangte pawh kahthlak a ni leh tawh bawk a, mahse China chuan a hmasa ber chauh kha an ta a ni tih a sawi a, hei pawh hi spy balloon ni loin, khawchin zirchianna tur zawk a ni tih a sawi.

US leh Canada sorkar chuan eng tak nge tih hriat loh, an ram china balloon thlawk lutte hi kar liam ta Zirtawpni, Inrinni leh Pathianni khan an kapthla a ni. Heng an kahthlak them hi zawng khawmin zirchian an tum. Kar liam taa an kahthlakte hi Chinese spy balloon nia an sawi an kahthlak takte nen erawh inang lo nia sawi a ni.

Nimin khan China foreign ministry thupuangtu, Wang Wenbin chuan kum 2022, January thla aṭang khan an ramah US chuan balloon 10 chuang zet a tir tawh tiin a puh lêt ve leh thung. "China thuneitute lam phalna engmah nei loin, nikum chhung ringawt khan US balloon-te hi rawn thlawh luh tir an ni," a ti. Dan loa ram dang airspace va luh chu US tihdan fo a nih thu a sawi bawk.