Myanmar sipai sorkarin mi rinawmte ralthuam kawl phalsak dawn

Myamnar sipai sorkar chuan civil mi, sorkar tana mi rinawm nia a ngaihte chu ralthuam kawl phalna, license an dil a phalsak dawn.

Tualchhung media-ten an tarlan danin, kum hnih liam taa civil sorkar thuneihna hnehchhuhtu, sipai general-te chuan civil mi, kum 18 chunglamte chu silai leh a mu kawl phalna pek an tum a ni. Hei hi home ministry document, phek 15-a chhah putru aṭanga hriat niin an sawi.

Sipai sorkarin silai kawl a phalsakte chu 'nungchang ṭha, ram tana rinawm' an ni tur a ni a, ram himna tibuai leh tiderthawng zawnga chetnaa inhnamhnawih a ni tur a ni lo. Permit neitute hian tualchhung thuneituten ram venhimna kawnga chet chhuah a ṭul an tih hun leh, pawikhawihna thleng tur venna kawnga chet a ngai tih an sawi hunah an thu an zawm zel tur tiin document-ah hian tarlan a ni bawk. Sipai thupuangtu, major general Zaw Min Tun chuan BBC Burmese language service-in a kawmnaah, silai licence pekchhuah tum a nih thu hi a nemnghet a ni.

Sipaiten thuneihna an chan hnuah khan, sipai sorkar dodal zawnga che chu 'firfiak' tiin an sawi a ni.

Sipai sorkar a din hnuah tualchhung buaina chhuakah civil mi 31,022 an thi tawh niin Armed Conflict Location and Event Data Project (ACLED) chuan a sawi a, sipaite hian sipai sorkar dodaltu lakah beihpui a thlak chhunzawm reng bawk.

United Nations chuan tualchhung buaina chhuak vang hian mi maktaduai 1.2 vel chuan an in chhuahsanin, ram chhung hmun dangah himna an zawng a, mi 70,000 vel chu ram dangah an tlanchhe tawh bawk niin a sawi.