South Africa leh New Zealand-ah emergency puang
South Africa leh New Zealand chuan an rama ruahsur leh thlipui tlehin chhiatna nasa tak a thlen avangin state of emergency an puang.
South Africa : South Africa sorkar chuan ram chhung hmun hrang hranga ruahsur nasain tuilian a thlen avangin Thawhṭanni khan state of emergency a puang. Hemi hma lawk hian kawlphetha lam an indaih loh avangin sorkar chuan 'state of disaster' a lo puang tawh bawk.
Kar liam ta chhunga ruah sur nasa vangin South Africa-a province pakua zinga pasarihte chuan tuilian hi an tuar a ni. Tuilian hi in leh motor-te a len a, kawngpuite len chhiain infrastructure tam tak a chhe bawk. Loneituten an tuar nasa hle a, an thlai chin bakah ranvulh an chan nasa hle a ni.
President Cyril Ramaphosa chuan tuilian tuarte ṭanpui leh chhawmdawl hna thawhna kawnga non-governmental organisation (NGO) leh pawl dangte inpekna chu fakin, sorkar hmalakna kawngah pui zel turin a ngen.
New Zealand : New Zealand ram pawhin thlipui, cyclone Grabrielle tlehin an ramah chhiatna nasa tak a thlen avangin nimin khan state of emergency a puang ve bawk. Ruahtui pai thlipui tleh hian tuilian bakah leiminte a thlen a, mi tam tak hmun him lama sawnchhuah a ngai a ni.
Prime minister Chris Hipkins chuan thlipui tlehin chhiatna a thlen chu a nasa hle tih sawiin, mi nuai 2.25 vel chu electric supply nei loin an awm mek a ni, a ti. Chhiatna thleng vanga thi report a awm lo a, hliam tuar leh insawnchhuah ngai zat tak erawh chu sawichian theih a la ni lo tih a tarlang.
New Zealand sorkar hian kum 2011 khan lirnghing vang leh, kum 2020-ah Covid-19 hri leng vangin national emergency a lo puang tawh bawk a ni.