Khawthlang ramten Israel sorkar policy an dem

Israel sorkarin Pakistan ram a luah, West Bank-a Juda-te chenna tur in sak belh a tum chu khawthlang ram lian panga, France, Germany, Italy, UK leh US-te chuan an dem thu an sawi.

US chuan Israel-a far-right sorkar thiltih tum hi a ṭha a tih loh thu a lo sawi tawh a, hemi hnu hian France, Germany, Italy leh UK foreign minister-te pawhin an dem thu an sawi ve leh a ni. Ram palite hian thuchhuah inṭawm siamin, West Bank-a Israel sorkarin in sak belh a tum chu Israel leh Palestinian-te inkar tichhe zualtu tur leh, two-state solution chungchanga inbiakna ngaih pawimawh lohna a ni, an ti.

Middle East-ah boruak muanawm tak a awm zel an duh thu sawiin, hei hi inbiakna hmang chauhin tihhlawhtlin theih a ni, tiin an sawi.

Norway foreign minister Anniken Huitfeldt pawhin Israel sorkar thil tih tum hi sawiselin, 'Israel-in a ram luaha settlement policy a kalpui hi international law kalh a ni a, tihtawp a ngai a ni," a ti.

Israel ṭhenawm Arab ram - Jordan, Egypt leh Saudi Arabia sorkarte pawhin Israel sorkar hmalak tumna hi an dem thu an lo sawi tawh bawk.

Hetih lai hian Israel security minister Itamar Ben-Gvir chuan Juda-te chenna tur hmun tam zawk siam zel a duh thu sawiin, "Israel ram chu Israel mite ta a ni," a ti.

Israel cabinet meeting, Pathiannia thukhawm chuan West Bank-a phalna nei hmasa loa Juda-te awmna hmun pakua siam chu pawmsak a remtih bakah, in sak belhna tur pawh an pawm thuai tur thu an sawi a ni. Ben-Gvir chuan, "Hei hi kan mission, kan doctrine a ni. Hmun pakua awm chu a ṭha a, mahse a la tawk lo. Kan duh belh zel a ni," tiin a sawi.

Finance minister Bezalel Smotrich chuan in 10,000 vel sak belhna tur an pawm dawn niin a tarlang.