New Zealand-ah magnitude 6.1-a nain lir a nghing

New Zealand sorkarin an rama thlipui, cyclone Grabrielle tlehin chhiatna nasa tak a thlen avanga state of emergency a puan hnuah, nimin zing khan magnitude 6.1-a nain lir a nghing zawm leh.

Lirnghing hian thil tihchhiat lian tham a neih report a la awm lo a, tsunami warning pawh tihchhuah a ni lo bawk.

Hetih lai hian thlipui tleh hian North Island-ah chhiatna nasa tak thlenin, harsatna tawkte chhanchhuah hna thawh mek a la ni. Mi pali in nunna an chan tawh a, mi 10,000 chuang chu hmun him lamah hruaichhuah an ni tawh bawk.

Nimin zinga lirnghing hi a 'epicenter' chu Paraparuamu khua aṭanga km 50 vel niin, an ram khawpui Wellington-ah pawh an hre thei a ni.

Cyclone Gabrielle tleh chu reh tawh mah se, thlipui tlehin thil a tichhiatte zirchian mek a ni. Tuilian leh leiminte a thlen avangin,chhiatna thlenna biala chengte chu tui thianghlim leh ei turte chhek khawl turin an chah.

Prime minister Chris Hipkins chuan thlipuiin an ram a nuai hnuah mi eng emaw zat chin hriat lohin an la awm thu sawiin, heng mite hi ngawrh taka zawn mek an ni, tiin nimin khan a sawi. Hmun tam zawkah ruah sur hi ziaawm tawh mah se, tuilian vangin khaw eng emaw zat kalpawh theih lohin an la awm a ni.