Israel Parliament-in Israeli Arab mi pawikhawihtute Israel citizenship hlihsak theihna tur dan siam a pass

Israel Parliament chuan Israel mite beitu, Israeli Arab thiam loh chantirte chu Israel khua leh tui an nihna hlihsak theihna tur dan a pass a, Palestinian Authority (PA) aṭanga sum lama chhawmdawlna dawng an nih chuan West Bank emaw, Gaza Strip-ah thawnchhuah theih an ni bawk ang.

Nilainia Parliament-a dan thar pass hi Arab lawmaker-te bakah Palestinian-te chuan an sawisel nasa hle. He dan thar hmang hian East Jerusalem-a cheng, Palestinian-te chu an residency rights paihsak theih an ni dawn bawk a ni.

Parliament-a sawihonaah MP tam zawk chuan he dan hi thlawpin, he dan hmanga hrem ngaite chu Israel ram phatsantu an ni tihna a nih mai thu an sawi. Vote laknaah he dan siam thar hi member 94 in an thlawp a, a thlawp lo lamah vote 10 chauh a tla.

Sawiseltute chuan he dan thar hian Palestinian-te beitu, Jewish Israeli te a huam tel ve dawn loh avangin chi inthliarna nasa tak a ni tih thu leh, international law kalh a nih thu an sawi. Palestinian prisoners' club hotu, Kadoura Fares pawhin he dan hi Palestinian-te tana thil hlauhawm tak, an chenna khawpui aṭanga sawnchhuah theihna tur remchang a ni dawn a ni, a ti. Palestinian Ministry of Foreign Affairs chuan chi inthliarna nasa ber a ni, tiin an sawi bawk.

PA hian Israel mite an beih avanga man tawkte chu thla tin stipend a pe ṭhin a, hei hian sawisel pawh a hlawh fo bawk. Palestinian mi tam tak chuan Israel jail-a Palestinian mi tangte chu pasalṭha ang hialah an chhuak ṭhin a ni. Israel chuan PA policy kalpui chu Israel mite chunga pawikhawihna thlen tura fuihna ang hialah a ngai a ni. Hei vang hian pawikhawihtu, Israel citizenship emaw Jerusalem residency rights emaw nei, PA aṭanga ṭanpuina sum dawngtu nia an hriatte bank account leh thil neih dangte pawh khawih chet theih lohin an lo dahsak fo tawh a ni.

Israel jail-ah hian Palestinian mi 4,700 vel an tang mek a, an zinga 360 chu Israel citizen emaw, East Jerusalem-a cheng residency rights nei an ni.