Al-Qaida firfiak pawl hotu thar Saif al-Adel

Al-Qaida firfiak pawl hotu thar atan Egyptian special forces officer hlui, Saif al-Adel chu chuhtu dang awm loa thlan tlin a ni tih UN report chuan a tarlang. Al-Adel hi a hma aṭangin a lumanah USD mtd 10 puan lo ni sa tawh a ni.

Kum 2011 khan al-Qaida dintu, Osama bin Laden chu US sipaiten an lo kaphlum tawh a, hemi hnu hian Aayman al-Zawahiri chuan an pawl hi a kaihruai zui a ni. Nikum khan Kabul khawpuia US missile hmanga beihnaah al-Zawahiri hi a thi nia sawi a ni a, al-Qaida chuan a thlaktu chungchang hi engmah an tarlang zui lo a ni.

Mahse UN report ch+uan, nikum kumtawp lama member ram hrang hrangten an sawihonaah, Saif al-Adel hian an pawl hi a kaihhruai tawh nia an ngaih thu an sawi. An pawl hotu hluite anga video leh thil dang hmanga US vauna tihchhuah ṭhin ang kha kalpui loin, Adel hian inpholang loin al-Qaida chu khawvela firfiak pawl hlauhawm bera siam leh tumin a kalpui mek niin an sawi.

Kum 1998, November thla khan US federal grand jury chuan civil mi 224 thih phahna leh mi 5,000 chuangin hliam an tawrh phahna, Tanzia leh Kenya-a US embassy-te beihnaah Adel hi a inhnamhnawih avangin thubuai a lo siamsak tawh a ni. FBI most wanted list-ah pawh a thlalak hi dah tel a ni.

Africa rama pawikhawihna bakah training camp a siam leh, kum 2002-a Pakistan-a US journalist Daniel Pearl thahnaa a inhnamhnawih chungchang bak chu Adel chanchin hi hriat tur a tam lo hle.

US state department chuan Adel hi Iran-ah a inkhuar nia sawiin, "al Qaeda's leadership council" member leh an pawl military committee hotu a ni ṭhin tih a sawi a, a chanchin leh a awmna hrilh thei hnenah USD mtd 10 thleng pek a lo phal tawh a ni.