Khawvelah hri kai mtd 18 chuang tawh

Khawvela hripui leng mek, Covid-19 kai chu mi maktaduai 18 an chuang tawh a, he hri vanga thi hi mi 6,93,003 an tling tawh. Hri kai tamna ber, US-ah chuan hri leng hian ziaawm lam a la pan lo a, khawpui bakah thingtlang lam bialah pawh a la darh belh zel a ni. US-a hri kai hmuh tawh hi maktaduai 4.68 an ni tawh a, mi 1,55,000 chuangin an thihpui tawh bawk. 

Latin America-ah hri kai an la pung chak hle bawk a, hri kai hmuh chhuah tawh hi maktaduai nga an chuang tawh a ni. Latin America-ah hian khawvela mihring awm zat zinga 8% vel an cheng a, hetih lai hian tuna hripui leng mek kai zinga 30% chu an bial chhunga mi an ni. 

Brazil-ah hri kai hi maktaduai 2.7 awm tawhin 94,130 in an thihpui tawh a, Colombia-ah hri kai 3,00,000 chuang tawhin he hri vanga thi mi 10,000 an tling tawh bawk. Argentina ramah pawh hri kai hi an pung chho leh nasa hle. Khawvela hri kai tamna ram 10 zingah Latina America ram panga an tel a ni. 

Singapore sorkar chuan hri darh zel tur venna atan, ram dang mi khualzin lutte chu inkhung hrang tura tih chu an zawm em tih  hriat theihna turin electronic tag vuah sak vek an ni dawn tih a sawi. 

Hri leng vanga hun eng emaw chen inkharkhipna kalpui a nih hnuah sorkar chuan ramri te a hawng leh ṭan tawh a ni. August 11 aṭang hian ram dang aṭang lut, sorkarin hmun a siam ni lo, in lama inkhung hran phalsakte chu dan an zawm em tih hriat theihna turin electronic device hi vuah tir zel an ni ang. Hemi hmang hian an awmna chin pawh hriat theih a ni dawn a ni. 

He device hian GPS leh Bluetooth signal a hmang a,a vuahtu hian tinung reng tur a ni. A inkhung hranna hmun a chhuahsan dawn chuan device hian thuneitute lam a hriattir ang. He device hi Singapore  khua leh tui, ram dang aṭanga lutte pawh vuah tir an ni dawn a, naupang kum 12 hnuai lam erawh a huam tel lo. Hong Kong leh South Korea pawhin quarantine mekten dan an zawm ṭha em tih  hriat theih nan electronic wristband an lo vuahtir ṭhin bawk. 

Philippines president Rodrigo Duterte chuan an ram khawpui, Manila-ah vawiin aṭangin kar hnih chhung atan inkharkhipna khauh zawk kalpui a ni dawn tih a puang. 

President hian Metro Manila leh a chhehvel province, Laguna, Cavite, Rizal leh Bula­can-te chu "Modified Enhanced Community Quarantine" (MECQ) hnuaiah August 18 thleng dah a remti tih a thupuang­tu Harry Roque chuan a sawi. Inkharkhipna hman a nih chhung hian sumdawnna hmun leh public transport-te khar a ni ang. 

Inkharkhipna kalpui leh tur thu puan a nih hma hian, tualchhung pawl hrang hrang 80, doctor 80,000 leh nurse tam tak awmnate chuan hri leng dona kawngah sorkar chu a hlawhchham chho nia sawiin, inkharkhipna khauh zawk kalpui turin an lo nawr tawh a ni. 

Pathianni khan Philppines-ah hian hri kai hmuh chhuah thar mi 5,032 awmin, ni khata hri kai hmuh chhuah tam ber ni a ni. Hri kai hmuh tawh hi mi 1,03,185 awm tawhin, an zinga 2,059 in an thihpui tawh. President Duterte chuan hri kaite enkawlna kawnga thawktu indaih loh avangin medical professional 10,000 chhawr belh a remti bawk.