NKorea-in SKorea leh US military drill neih tur a vau

South Korea leh United States-ten an lo ruahman lawk tawh anga joint military exercise an nei a nih chuan na taka chhan let an ni dawn tiin North Korea chuan a vau.

North Korea foreign ministry thupuangtu chuan SKorea leh US-in kumtin an neih thin, Freedom Shield joint military exercise an neih tum leh chungchangah nimin khan thuchhuah hi siamin, an kaltlangpui lui a nih chuan na takin chhan let an ni dawn a ni, a ti. US leh SKorea-in sipaite joint exercise a buatsaih thin chu NKorea ram runna tura an inbuatsaihnaah an ngai reng tih a sawi nawn leh bawk. 

Kim Jong-un fanu hming ang put ve khap

North Korea ram chuan an rama hmeichhiate chu an hotu lu ber, Kim Jong-un fanu hming, Ju Ae tih an put ve a khap a, hetiang hming lo pu tawhte pawh an hming thlak tura tih an ni.

Radio Free Asia-in a tarlan danin, Jeongjy City-a ministry of security chuan 'Ju Ae' tih hming pu, resident registration department-a in ziak lutte chu koin, ministry of safety-ah an hming thlak vek turin a hriattir a ni. Pyongsong City Security Department pawhin central sorkar atanga thupek an hmuh angin, 'Ju Ae' tih hming pute chu kar khat chhunga an hming thlak vek turin a ti bawk. Thuneitute chuan 'Ju Ae' tih hming chu mi pawimawh tak hming atana dah a ni tawh tih an tarlang.

South China Morning Post chuan hetianga hming humhalh bik hi NKorea dintu, Kim Il-sung hun lai atanga kalpui a ni tih a tarlang a, a hun lai pawhin an hming ang hi midangin an put ve khap a ni. Kim Jong-il hunlai pawh khan a hming ang pute chu an hming thlak tir an lo ni tawh bawk. King Jong-un-a'n thuneihna a chelh hnu khan, sorkar chuan Jong-un tih leh a nupui, Sol-ju hming ang lo pute chu an hming a thlaktir bawk a ni.