Turkey-Syria lirnghinga thi 41,000 tling tawh

Turkey leh Syria rama lirnghing na takin chhiatna a thlen vanga thi chu mi 41,000 an tling tawh niin nimin khan United Nations chuan a sawi a, ram pahniha harsatna tawk mekte tanpui leh chhawmdawlna turin USD tluklehdingawn 1 mamawh a nih thu a sawi bawk.

Lirnghingin chhiatna a thlen vanga thi report hi Turkey-ah 38,044 awmin, Syria ramah 3,588 an awm tawh bawk.

February 6-a ram pahniha lirnghing hi kum 100 chhunga khawvela lirnghing, thihna thlen nasa zual 10 zingah a tel a ni.

Lirnghing vanga in chim hnuaia tang mi tam tak an la awm a, heng mite zawn leh chhanchhuah hna thawh chhunzawm reng ni mah se, nungdama hmuh erawh an beisei tawh lo.