UN-in Rohingya refugee-te ei tur pek zat a titlem dawn

United Nations chuan Bangladesh-a Rohingya refugee-te chhawmdawlna, ei tur a pek thin chu fund indaih lohna vangin a titlem dawn tih a sawi.

Bangladesh-a Rohingya raltlan awm zinga nuai 7.3 vel chu kum 2017-a Myamnar sipaiten an rama Rakhine state-a beihpui an thlak avanga tlanchhiate an ni. Hemi hma hian mi dang eng awm zat chu Bangladesh-ah hian a lo lut tawh bawk a, mi maktaduai khat vel chu mau leh plastic sheet-a siam inah an khawsa mek a ni.

World Food Programme (WFP) chuan thla thar atangin raltlan mi pakhat hnenah ei tur, USD 12 hu zel a pek thin chu USD 10-ah a tihniam dawn tih a sawi. Ei tur tihtlem hian khawvel refugee awmkhawmna hmun lian bera chengte zingah hian chaw lam tlakchham leh malnutrition vanga buaina an neihte a belhchhah hlauhthawnna a lian hle.

Refugee camp-a awmte hi Bangladesh sorkar chuan pawn lama hna an thawk a phalsak lo a, camp an chhuahsan theih lohna turin hung vek a ni bawk. Mahse mi tam tak chu camp atang hian chhuakin, lawngin Malaysia leh Indonesia lamte an pan a ni. Ningani pawh khan Bangladesh atang hian Indonesia Aceh province-ah Rohingya refugee 69 hi lawng hmangin an thleng an ni.