Nepal-in a map thar siam UN-ah thawn tum

Nepal ram chuan tunhnaia an ram map thar a siam chu tun thla lai hawl chhunga United Nations agency hrang hrangah leh ram hrang hrangah thawn darh tum a nih thu Land Management, Cooperatives and Poverty Alleviation minister Padma Aryal chuan a sawi.

Map hi copy 25,000 lai Nepal Department of Measurement chuan an print chhuak a, heng zinga copy 4,000 chu sap ṭawnga print a ni a, heng mapte hi ram hrang hrang hnena semchhuah tum a nih bakah UN agency hrang hranga semchhuah tura hmalak a ni bawk. Provincial leh public office-ahte chuan a thlawna sem tum a ni a, mimal chuan Nepal Rupee 50-in an lei thei ang. 

Kumin May 20 khan Nepal prime minister KP Sharma Oli kaihhruai cabinet-in political map thar a pawm a, June 18 khan Nepal Parliament upper house, National Assembly-ah political map thar siam chu lungrual taka pawm a ni zui bawk. He map tharah hian India leh Nepal inrina, ram pahnihten an inchuh mek Lipulekh, Kalapani leh Limpiyadhura ramte chu Nepal ram chinah rin luh an ni.    

Ram pahnihte inchuh mek hi Nepal chuan a ram china a chhal tak avangin India chuan a pawm thei lo a, Nepal lakah a lungawi lo hle. Heti chung hian Nepal chuan a ram map thar pek chhuah a tum zingah India pawh a tel a ni.