Turkey-in Chhanchhuah hna thawh a titawp
Turkish Disaster and Emergency Management Presidency (AFAD) chuan an rama lirnghing na tak a thlen hnua chin hriat loha awmte zawn leh chhanchhuah hna thawh chu nizan aṭang khan an titawp tih an sawi.
February 6-a Turkey chhimchhak lam leh, a ṭhenawm Syria ramah magnitude 7.8-a naa lirnghing vanga thi mi 46,000 chuang an awm tawh a, mi maktaduai tel chu chenna nei loin an awm mek bawk. Turkey ram bikah hian chhiatna thleng vanga thi hi 40,642 an tling a ni.
Ram pahnihte hian chin hriat loha awm zat hi sawichiang lo mah se, lirnghingah hian in sang tel a chim avangin, thi zat hi an la punchhoh hle rin a ni. In chimin a delhte zawn leh chhanchhuah hna hi ngawrh taka thawh a ni a, mahse in chim hnuaia tangte nung dama hmuh beiseina a awm tawh lo tih an sawi.
Kar hnih chhung chhanchhuah hna hi thawh a nih hnuah, an titawp ta a ni. Hetih lai hian lirnghing tuarte chhawmdawl hna erawh theitawpa thawh chhunzawm zel a ni ang.
World Health Organisation (WHO) chuan Turkey leh Syria ramah hian mi maktaduai 26 vel chu chhawmdawl ngaiin an awm mek tih a sawi. Nimin khan US secretary of state Antony Blinken chuan Turkey hi tlawhin, harsatna an tawh mekah US chuan eng angin a puih theih ang, tih a sawipui dawn.