NKorea-in ICBM test a neih thu nemnghet

North Korea chuan kar liam ta Inrinni khan intercontinental ballistic missile (ICMB) a enchhin thu a sawi. Hei hi United States leh South Korea-in joint military exercise neih tuma ruahmana an siamte a chhanletna pakhat a nih thu a sawi bawk.

NKorea official Korean Central News Agency chuan Inrinnia en­chhin hi Hwasong-15 ICBM a nih thu leh, a hmaa engmah sawi lawk awm loin Kim Jong-un thupek angin rang taka test hi neih a nih thu a tarlang. He test hi ralthuam rintlak dan enfiahna leh, an ramin nuclear force lama indona hmachhawn tura an inpeihzia lantirna a nih thu a sawi bawk.

Missile hi km 5,770-a sangah km 990-a thui thlawkin, darkar khat leh minute 6 a thlawh hnuah Korean Peninsula leh Japan inkar tuipui a target chu dik taka a fuh thu a sawi. Hetih lai hian Japan chuan missile hi an ram chin tuipuiah a tla niin a sawi thung.

Hwasong-15 hi North Korea-in ICBM pathum a neih zinga pakhat niin, an vai hian liquid propellant hmang vek an ni. Kum 2017-ah a ṭum khatna atan Hwasong-15 hi an lo enchhin tawh a ni. Solid-fuel hmang ICBM hi siam an tum leh mek a, hei hi hmelma lamin tan hmuh fuh a har zawk nia sawi a ni.

UN Security Council resolution hnuaiah North Korea hi ballistic missile leh nuclear weapon prog­ramme a kalpui khapsak a ni. Mahse NKorea chuan US leh a thawhpui ram dangten an ep mekna, lo do letna turin an ralthuamte thuam chak a ṭul thu a sawi ve thung.