Israel-in missile hmangin Damascus a kap

Israel chuan nimin zing khan missile hmangin Syria khawpui, Damascus-a kap a, residential building telin mi 15 an thi. Thi zingah hian civil mi pawh an tel niin Syrian Observtory for human rights chuan a tarlang.

Missile hian Damascus khawpui laili lai, Karfa Sousa-a Iran ho hmun pakhat bula security complex a fuh nia sawi a ni. Israel hian Damascus a beih hian mihring chenna hmunte a kap ngai lem lo a, ram ruak laite a kap ṭhin. Mahse nimin zinga a missile kah hi chuan residential area a fuh a ni.

Israel hian Syria rama Iran-in ralthuam a phurh luh leh, a sipaite a dah hi ngaimawhin Iran hmunte hi a bei fo a ni. Kumin January 2 pawh khan Israel chuan Damascus-a international airport bulah missile kapin, sipai pahnih thiin mi dang pahnihin hliam an tuar. Hetih lai hian Iran chuan Syria ramah hian a sipaite a dah luh belh zel a, hmun tam tak chu an thununna hnuaiah awmin, Iran kaihhruaina hnuaiah hian hel leh local paramilitary group member sang tel an awm tawh niin khawthlang lam intelligenc-te chuan an sawi.