President Trump-a'n Tiktok khap a tum Tiktok neitute ni 45 hun a pe

United States president Donald Trump chuan China company, ByteDance siam,  short-form video app TikTok app chu an ramah khap a tum thu a sawi hnuah, Microsoft Corporation-in lei tuma hma an lak avangin Tiktok neitute chu an hralh theihna turin ni 45 hun a pe leh. 

Chinese mobile app, TikTok hi Indo­nesia, Bangladesh, India leh Pakistan-ah te khap a lo ni tawh. Khap leh dodal a nihna chhan hi a hmangtute personal data hi China sorkarin a hriatruk sak theih nia sawi a nih vang a ni a, hei hi ram security atan a him loah an ngai. President Trump pawhin Zirtawpni khan TikTok hi a him lo nia sawiin, an ramah khap a tum thu hi a puang a ni. 

President Donald Trump-an TikTok khap a tum thu a sawi lai boruak hian, Microsoft Corporation chuan he video app hi lei tuma hma a lak thu a sawi. Hei vang hian Trump pawhin a siamtu China company, ByteDance hnenah an TikTok app siam chu Microsoft Corporation hnena an hralh theih nan ni 45 chhung hun pek a rem ti ta a ni. 

Hemi chungchang hi Trump leh Microsoft CEO Satya Nadella chuan Pathianni khan Redwood-ah an lo sawi dun tawh a, Microsoft hian TikTok company an lei theih dan tur leh hemi atan hian September 15 aia tlai lohah inremna an siam hman theih an beisei thu Microsoft chuan thuchhuah a siam. 

Microsoft lam hian TikTok hi an lei thei a nih chuan US, Canada, Australia leh New Zealand-a an service atan chauh lei an tum a ni. Hei bakah hian he TikTok hmangtu American-te private data chu US-ah transfer in, US-ah bak khawiah mah a put chhuak dawn lo tih an tarlang bawk. Tuna US pawna data an dahna emaw back-up chu US-a transfer a nih theih hunah US pawna data chu delete nghal turin Mircosoft chuan a rel. 

TikTok app hi an lei a nih chuan Microsoft chuan US-a investor dangte chu share neih pui turin sawm tum an nih thu Micorsoft chuan a tarlang a, mahse 70% chu US aṭangin a ni thung ang. TikTok hi engzat chiahin nge Microsoft hian a lei dawn tih tarlan a ni lo a, mahse media ṭhenkhatte chuan US dollar vaibelchhe 50 a pelh an rin thu an tarlang. Microsoft hian an lei thei a nih chuan TikTok technology hi US technology mila siam tum a ni a, personal data pawh ṭha zawka humhim tum a ni bawk. US economy lamah hmasawnna a awm theih nana lei tum a ni a, tunkar chho hian Microsoft chuan ByteDance company thuneitu lamte nen inbiakna an nei chho dawn tih a tarlang. 

Microsoft leh ByteDance chuan hemi chungchang hi Foreign Investment in the United States (CFIUS) an hriattir tawh a, an lei thei a nih chuan a hmangtute tana security ṭha leh him tak an siamsak dawn bakah an lei tumna hmun US, Canada, Australia leh New Zealand-ahte hian langtlang takin TikTok hi hman theih tura siam a ni dawn.  

US official-te chuan he app hmangtute personal information chu China sorkarin he app kaltlang hian an hriatruk theih an hlauh vangin US chuan khap hi a tum tih an lo sawi tawh a ni. US Senate Homeland Security and Governmental Affairs Committee chuan July 22 khan sorkar hnathawk (federal employees) te tana TikTok hman khapna tur bill chu lungrual takin an lo pawm tawh a ni. 

Kumin June thla aṭang khan TikTok chief executive officer (CEO) atan Kevin Mayer ruat a ni a, ani hi Walt Disney Direct-to-Consumer & International chairman hlui a ni. Kevin Mayer hi American business­man a ni a, TikTok-a CEO a nih bakah he app siamchhuaktu ByteDance Ltd-a chief operating officer (COO) a ni bawk. US mi leh sa a nih avangin US, Washington-a hmunpui nei Microsoft Corporation-te tana dawr harsa lutuk tur a nih a rinawm loh. Chutih rualin Trump hian a rilru a thlak angem tih chu media-te ngaihven rawn a ni zui bawk.