President Joe Biden-a'n puangzar lawk loin Ukraine a tlawh
US president Joe Biden chuan puangzar lawk loin nimin khan Ukraine khawpui, Kyiv a tlawh a, hei hi Russia-in Ukraine a run hnuah a tlawh ṭum khatna a ni.
Ukraine president Volodymyr Zelenskyy chuan US President nena an thlalak dunna hi a official telegram account-ah dahin, an ram a tlawh avanga a lawm thu leh, Ukraine mipuite a thlawpzia a lantirna pawimawh tak a nih thu a sawi.
Ram hruaitu pahnihte hian indonaa Ukraine sipai thite hriatrengna siam, Wall of Remembrance of the Fallen an tlawh dun a ni. President Biden chuan Ukraine ram an thlawpna thu sawi nawn lehin, "Kum khat dawn liam taa Putin-a'n a run khan, Ukraine chu ram chak lo tak leh khawthlang ramte pawh inlungrual lo takah a ngai a, min hneh mai turin a ring a ni. Mahse a tidik lo hle. Nikum chhung khan US chuan Ukraine thuam chak a, pui turin US chuan Atlantic aṭanga Pacific thlengin ram hrang hrangte thawhpuina ṭha tak a siam, Ukraine sipai leh an ram economy lam thlenga puihna tur pawh siamin, hei hi chhunzawm zel a ni ang," tiin a sawi.
Kumin January thla khan US senator leh official ṭhenkhat chuan Kyiv hi tlawhin, President Zelenskyy hi an lo hmu tawh bawk.
Ukraine President pawh hian nikum December thla khan US a tlawh a, US Congress-ah thu sawiin, Russia-in a run mekah an ram puihna lantir zel turin a lo ngen tawh bawk a ni.
Russia-in a ṭhenawm, Ukraine ram a run hi February 24 hian a kum khatna a tling dawn a ni.