Brazil rama tuilian vangin mi 36 an thi

Brazil rama ruahsur nasa in tuilian leh leimin nasa tak a thlenah mi 36 an thi a, mi tam tak hmun him lamah an insaseng bawk.

Ruahsur hian Sao Paulo state-ah chhiatna nasa tak a thlen a, a bikin Sao Sebastio khuaah leimin hian in eng emaw zat a hnawl a, thingkung tlu leh tuilianten motor tamtak an tichhe bawk tih Pathiannia state sorkar thuchhuah chuan a tarlang.

Sao Paulo state Governor Tarcisio de Freitas chuan chhiatna thleng vang hian tuipui kam khaw pangaah state of emergency a puang nghal bawk. Chhiatna tawkte chhanchhuah hna thawk mek a ni a, mahse hmun ṭhenkhat erawh tlawhpawh theih lohin an awm tih a sawi. Chenna nei loa awm mi 566 vel an awm mek a ni, a ti. Sao Paulo-ah hian ruah hi a la sur chhunzawm zel dawn nia sawi a ni a, hei vang hian chhiatna thleng vanga thi pawh hi an la pun chhoh a rinawm hle.

Sao Sebastiao, Ubatuba, Ilhabela leh Bertioga khuaah chuan carnival neih turte ṭhulh nghal vek a ni.

President Luiz Inacio Lula da Silva chuan chhiatna tawkte chhanchhuak leh ṭanpui turin theihtawp chhuah a nih thu a sawi a, chhiatna thlenna hmun hi a tlawh dawn tih a sawi bawk.