Russia President-in ram mipuite hnenah thuchah sawi Indo bul ṭantuah khawthlang ram leh Ukraine puh

Russia president Vladimir Putin chuan nimin khan Parliament-ah ram mipuite hnena thuchah, state of the national address sawiin, Ukraine-a beihpui an thlak mek an chhunzawm zel tur thu a sawi. Indo bul ṭantuah khawthlang ramte leh Ukraine a puh bawk.

President Putin-a'n Parlia­ment-a thu a sawi hnuhnung ber chu kum 2021, April thla kha niin darkar khat leh minute 19-a rei a sawi. Kum 2018 kha a sawi rei ber ṭum niin darkar 1 leh minute 55-a rei a sawi a, a sawi rei loh ber chu kum 2004 leh 2005-ah, minute 48-a rei ve ve a sawi.

Nimina a thu sawiah, Putin chuan khawthlang ramte chu na taka bei lehin, Ukraine buaina tipunluntu, mi tam tak thih­na thlenna chungchanga mawh­phurhtu an ni, a ti. "Tualchhung buaina chu khawthlang ram chuan khawvel pum buainaah siam a tum a, an thil tum hi kan hrethiam a, hei vang hian a nih dan tur ang takin kan chhanglet zel dawn a ni," a ti.

Russia chuan Ukraine nena an buaina chu boruak ṭha tak hnuaia chinfel a duh laiin, khawthlang ramte chuan kawng dang an dap zawk a ni, a ti. Khawthlang ramte chu Ukraine ram indona bulṭantu a ni a, Russia chuan hemi lo titawp tur hian a sipaite a hman a ngai ta a ni, tiin a sawi.

Nikuma Russia sipaiten Ukraine-a 'special military ope­ration' a neih hma khan, NATO chuan Ukraine chu artillery leh nuclear ralthuamte a lo pe tawh a ni tih Putin chuan a sawi. US chu a hminghmerha sawilang loin a vau zui nghal bawk a, "Ukraine tan ralthuam pek tam a nih poh leh, kan tana hlauhawmte umbo tura kan beih let nat a ngai dawn a, kan hmachhawnte chingfel turin fimkhur takin kan kal zel dawn a ni," a ti.

UKraine mipuite chu khaw­thlang ramten an hrengbet vek tawh a ni tiin, Ukraine mipuite chu anmahni thu anga awm thei tawh lohah a puh a, "An sorkar hian an ram ṭhatna turin engmah a thawk lo," tiin Ukraine president Volodymr Zelenskyy chungchang a sawi zui bawk.