EU-in Myamnar sipai sorkar hotute hrekna thar a siam

European Union (EU) chuan Myanmar sipai sorkara official leh pawl ṭhenkhat hrekna a siamthar leh.

EU-in zin khapna leh EU rama an thil neih khawih chet theih loha hrekna a siamtharte hi mimal leh pawl 16 niin, an zingah hian sipai sorkara energy minister, sumdawng lian leh high-ranking officer-te an tel. Heng mite mihring dikna chanvo nasa taka an palzut avanga hrem an ni tih a sawi.

Thuchhuah a siam­ah, EU chuan, "Sipai chakna hmanga civil sorkar paihthlaknaa mawhphurtute, human rights palzuttute leh thisen chhuahtute chu an phu ang hremna pek an ni tur a ni," a ti.

Kum 2021, February 1-a sipaiten civil sorkar thuneihna an hnehchhuh hnua sipaiten ram chhunga pawikhawihna hrang hrang an thlen, human rights palzut; civil society worker, human rights activist, journalist leh civilian-te tihhlum bakah thlawhtheihna hmanga school leh hospital--te an bei ṭhin chu an dem thu an sawi.

EU-in hrekna thar a tichhuak leh chu civil sorkar paihthlak tak aiawhtu atana din, National Unity Go­vernment chuan lawm­awm a tih thu a sawi a, advocacy group Burma Campaign UK pawhin an thlawp thu a tarlang bawk. Burma Campaign UK executive director Anna Roberts chuan, "EU chuan a tih tur dik tak a ti a ni. Mahse hrekna siam chungchangah a che muang mah mah a, sipaiten sum, ralthuam leh hmanraw dang an hmuh theihna kawngte a dansak mai loh avangin mi tam takin nunna an chan phah tawh a ni," a ti.

EU hian a hmaa hrek­na a lo siam tawhte nen, Myanmar-a mimal 93 leh entity 18-te chu hrek tawhin, heng mite hi UE-a an thil neihte khawih chet theih lohin a dah sak bakah an zin a khap bawk a, EU citizen-te pawh heng mite an thawhpui leh fund an pekte a khap bawk a ni.