Turkey-Syria a lirnghing nawn lehah mi 300 an hliam

Turkey leh Syria rama magni­tude 7.8-a lir nghingin chhiatna rapthlak tak thlenin, mi sing telin nunna an chan hnuah, an ram huna Thawhṭanni zan khan ram pahnihte border region-ah magnitude 6.4-a nain lir a nghing leh.

Thawhṭanni zana lirnghing hi a epicentre chu Turkey chhim lama Antakya khawpui bulah niin, Syria bakah Egypt, Lebanon leh Israel ram pawhin lirnghing hi an hria a ni. A hnu mintute thumah magnitude 5.8-a nain a nghing nawn leh bawk a ni. Lirnghingin chhiatna a thlenah hian mi pariat an thi a, hliam tuar mi 300 vel an awm bawk.

Kar hnih liam ta, February 6-a lirnghin na takin Turkey leh Syria rama chhiatna a thlena thi chu mi 47,000 an tling tawh a, Turkey ram bikah thi zat hi 41,000 an tling a ni.

Lirnghing vanga in chim hnuaiah ruang hmuh belh zel a la ni a, hei vang hian thi zat pawh hi an la pun chhoh leh rin a ni.