Ballot paper print-na tur sum neih loh vangin Sri Lanka-in Local election neih hun sawn tum

Sum lama tlachhe mek, Sri Lanka sorkar chuan March thlaa local election neih tur chu, vote tlakna tur paper ballot print-na tur sum a neih loh vangin inthlan hun sawn a tum.

March 9 hi local election neih hun tur a ni a, hei hi an ramin sum lama harsatna nasa tak an tawh hnua President atana nikum July thlaa lakluh, Ranil Wickremesinghe-a'n thlawptu a ngah tawk leh tawk lo fiahna atana thil pawimawh tak tur a ni.

Mahse Election Commission-in a tarlan danin, treasury chuan ballot paper print-na tur sum hi a pechhuak duh lo a, hei bakah hian inthlana duty tur police-te chhawrna tur leh fuel man pawh a pe chhuak duh lo niin a sawi. An mamawh sum pek chhuah a nih loh avangin Election Commission chief Nimal Punchihewa chuan a hmain local election hi a hun takah neih a ni dawn tiin Supreme Court hnenah lo sawi tawh mah se, sorkarin sum a neih loh avangin an buatsaih thei dawn ta lo tih a sawi.

President Wickremesinghe pawh hian sorkarin a hnathawkte hlawh, pension leh mamawh zualpui atana hman tur sum mamawh ang pawh a neih zawh loh laiin, inthlan lo buatsaih chu thil theih a nih loh thu a lo sawi tawh bawk. Inthlan buatsaihna atan hian Rs tld 10 (USD mtd 27.6) vel sen a ngai dawn nia chhut a ni.

Hetih lai hian eptu MP-te chuan sum awm loh chhuanlama inthlan neih tur a sawn chu President Wickremesinghe kaihhruai sorkarin thuneihna chelh chhunzawm an tumna hmanrua nia puhin, Thawhlehnia Parliament inkhawmah pawh rorel thei loin an aubuai a, inkhawm tihtawp a ngaih phah a ni.

Sri Lanka hi kum khat chuang chu sum lama tlachhiain dinhmun harsa takah an awm mek a, ram chhungah thil man a sang chakin an mamawh ang zat chawk luhna tur sum an nei lo a ni. An leiba hi USD tld 46 zet a tling tawh.