Iranian foundation-in Rushdie beitu hnenah ram pek a tum

Iranian foundation, Foundation to Implement Imam Khomeini’s Fatwas chuan Salmah Rushdie beitu hnenah lawmman atan ram, square meter 1,000 a zau an pe dawn tih an puang.

Foundation secretary, Mohammad Esmail Zarei chuan hemi chungchang hi sawichhuakin, "American ṭhalai pakhat, huaisen taka Rushdie bei a, a mit khing tidel leh a kut pakhat hman theih loha siamtu chungah Muslim-te chu an lawm hle a ni," tiin he tlangval hnenah hian agricultural land, sq m 1,000-a zau pek a ni ang, a ti.

'The Satanic Verses' a ziah avanga Islamist-ten thaha an vau fo, kum 75 mi Rushdie hi nikum August thla khan Western New York-a Chautauqua Institution-a hun an hmanaah, kum 24 mi New Jersey-a cheng, Lebanese chhulchhuak Hadi Matar chuan chemte hmanga beiin, hliam na tak a tuar a, a mit lehlamin khua a hmuh loh bakah a kut pakhat a hmang thei lo zui bawk a ni.