Gaza Strip aṭanga rocket hmanga beihna Israel sipaiten an chhang let nghal

Gaza Strip aṭanga rocket hmanga Israel beih a nih hnuah, nimin zing khan Israel sipaite chuan Gaza Strip an bomb zui ve nghal.

Nilaini zan khan Gaza Strip aṭang hian Israel lamah rocket kah a ni a, hei vang hian Israel-a Sderot leh Ashke­lon khuaahte siren tihrik a ni. Israel sipaite chuan air defence system hmang­in rocket panga chu lo kah­thlak a ni a, a parukna chu ram ruakah a tla niin an sawi. Palestinian pawl zingah rocket kapchhuaktu nia inchhal hi an la awm lo.

Israel sipaite chuan an beihna hi chhang letin, nimin zing khan Gaza khawpui hmarlam a bomb zui ve leh nghal a ni.

Nilaini khan Israel sipai­te chuan West Bank-a Nablus khuaah beihpui thlakin Palestinian mi 10 an thi a, mi dang 100 chuangin hliam an tuar niin Palestinian health authority chuan a sawi.

Israel sipaite hian Israel mite beitu, Palestinian mi pathum man tumin Nilaini zing khan Nablus kalpawhna kawngte dangin an mi man tumte awmna in an hual a ni. Mahse Palestinian Lions' Den armed group chuan Israel sipaite hi lo bei letin, an inbeihnaah hian sipaiten an man tum mi pathumte hi an thi a ni.

Kumina Israel leh Pales­tinian-te inbeihna hi a thleng fo tawh a, an inbeihnaah hian Palestinian mi 60 an thi tawh a, Israel ram chhunga Palestinian-te pawikhawihna thlenah Israel mi 11 an thi tawh bawk.