Turkey-ah chenna nei lo mi mtd 1.5 awm
United Nations Development Programme (UNDP)chuan tun hnaia lirnghingin chhiatna nasa tak a thlen vang khan Turkey ramah chenna in nei loin mi maktaduai 1.5 an awm phah niin a sawi.
UNDP chuan lirnghingin a tihchhiat, in nuai 5 vel sakṭhat a ngai dawn tih a sawi bawk. Lirnghingin in a tichhiat zinga 70% hi sorkar chuan a endik tawh a. In enfiah 4,12,000 zinga 1,18,000 chu luahzui tlak loh, sak ṭhat vek ngai an ni.UNDP Turkey resident representative, Louisa Vinton chuan in chim hnawk thenfai chu a hautak dawn hle tih sawiin,heng bawlhhlawh tam tak awmkhawm hian mihringte hriselna thlengin a nghawng loh theih dan tur pawh an ngaihtuah mek tih a sawi.
Lirnghing vangin mi 43,556 thi tawh
Turkey Interior Minister Suleyman Soylu chuan an ram lirnghing rapthlak tak thleng vangin nimin tlai thleng khan mi 43,556 an thi tawh tih a sawi.
Soylu chuan February 6-a lir a nghin hnuah aftershock vawi 7,930 a thleng tawh a, apartment nuai 6 chuang leh commercial premises 1,50,000 vel chu luahzui tlak lohin a chhe tawh tih a sawi bawk.