Pakistan-in inremchenna kalpui dawn

Sum lama harsatna tawk mek, Pakistan sorkar chuan inrenchenna a kalpui dawn a, minister leh adviser-te allowance leh zinna senso te pawh a titlem dawn.

Prime minister Shehbaz Sharif chuan inrenchenna kalpuina hmang hian, kum khatah rupees tld 200 vel a hum thei dawn niin a sawi.

PM chuan minister zawng zawng leh, sorkar office-te chu an sum hmanchhuah 15% a titlem vek tura hriattir an ni a, minister leh adviser-te chu luxury car hmang lo a, ram pawna zinchhuah pawh a theih anga pumpelh tur leh, an zing chhuah pawhin business class-a kal lo turin a ngen. A ngenna hi minister-te pawh hian an remti niin a sawi bawk.

Pakistan hian sum lama harsatna an tawh mekah, International Monetary Fund (IMF) aṭangin USD tld 1 hmuh theih a inbeisei mek a ni. Hetih lai hian IMF lamin an sum renchemna tura ruahmanna siam tura a phut angin hma a la zui a ni. Pakistan leh palaite hi inbe mekin, tunkar chhung hian thutlukna an siam theih beisei a ni.

Inrenchemna kalpuina atan hian sorkar hnathawkte hlawh tihtlem, minister tihtlem, leh an hlawh tihtlem pawh a ngaihtuah dawn nia sawi a ni a, hei bakah hian thil ṭhenkhat - nitin khawsak mamawh aṭanga chhiah lak tihsan pawh a tel bawk a ni. Sorkar hnathawk lak thar khap a ni ang a, kum thum liam ta aṭanga post ruakte pawh tihtawp vek a ni ang. Inter-Services Intelligence (ISI) leh Intelligence Bureau (IB) tana secret service fund pek pawh tihtlem a ni bawk ang.