Russia-i'n a run chamah Ukraine PM in thuchah a sawi ; 2023 hi hnehna kan chan kum a ni ang : Zelenskyy

Russia-i'n Fenruary 24, 2022-a Ukraine a run champha pualin president Volodymyr Zelenskyy chuan nimin khan an ram ṭhenawm laka tlawm mai an la tum loh zia sawiin, "2023 hi hnehna kan chan kum a ni ang," tiin kuminah an ramin zalenna an chan ngei a rin thu a sawi.

Kum 45 mi hian kum liam taa indona a thil thlengte chu video tawitea tarlangin, hrehawmna leh tawrhna karah pawh a ram mipuite chu Russia sipaite beihnate huaisen takin an lo tudai thei zel chu a fak hle. "February 24 khan, mi maktaduai tam takin thutlukna kan siam a ni. Flag var ni loin, flag pawl leh eng(an ram flag a sawina) tar kan thlang a. Tlanchhe loin, buaina kan hmachhawn. Kum kalta kha tawrhna, ṭahna, rinna leh inpumkhatnate kan nunpui a ni. Kuminah pawh hneh theih loh nun kan neih chhunzawm zel a ngai. Kum 2023 hi hnehna kan chan kum a nih kan ring vek tur a ni," tiin Zelenskyy chuan a sawi.

Khawthlang rama military official-te chuan ram pahniha thi leh hliam zat hi mi nuai 1 chuang an awm tawh thu tarlangin, Europe bikah Indopui pahnihna hnua an tam ber ṭum a ni, a ti.

"Mi tam zawk hian an phone contact list-a mi pakhat tal chu an chan vek ka ring. He indona hian pumkhatah min siam a, ṭhenkhatin an eitur an fun haw a, ṭhenkhatin an lo keng a, mahse, mi zawng zawngin an tha an thawh vek a ni," tiin Zelenskyy chuan Ukraine mipui chungah lawmthu a sawi.

Ukraine-in venhimna ṭha tak an neih theihnan rampawn aṭanga sum leh ralthuam lakluh kawngah Zelenskyy hi a thawhhlawk hle a, US chuan artillery ammunition, anti-armour system leh air defence radar USD mtd eng emaw zat hu pek a lo intiam thar leh tawh bawk a ni. Tunhnai khan, US president Joe Biden chuan puanzar lawk lohin Ukraine hi tlawhin, an ramin zalenna an neih theihnan theihtawpa hmalakpui zel a tum thu Zelenskyy hi a hrilh a ni.