Biden-a'n World Bank president atan Indian-American Ajay Banga nominate

US president Joe Biden chuan World Bank president thar thlan turah, US chuan Indian-American business leader, Ajay Banga a nominate tih a puang.

Joe Biden chuan Banga chu mi thiam, hun harsat tak karah pawh global institution kaihruai thei tur a ni, tiin an nominate chhan a puang.

Kum 63 mi, Banga hi General Atlantic-a vice chairman ni lai a ni. A hmain Mastercard president leh CEO a lo ni tawh bawk. Kum 2016 khan India sorkar chuan chawimawina sang, Padma Shri a lo hlan tawh a ni.

White House chuan Banga hi technology, data, financial service leh innovation lamah khawvel huap hruaitu ṭha tak a nih thu sawiin, International Chamber of Commerce-ah kum 2020-22 chhung khan chairman a ni a, Exor-ah chairman ni bawkin, Temasek-ah independent director a ni bawk. Boards of the American Red Cross, Krafts Foods and Dow Inc-ah te pawh a lo awm tawh.

Banga hi The Cyber Readiness Institute co-founder a ni bawk a, Economic Club of New York vice chair ni tawhin, Barack Obama hunlaia Commission on Enhancing National Cybersecurity member a ni bawk a ni.

Kum 2011 khan Foreign Policy Association Medal hlan a ni a, kum 2019-ah Ellis Island Medal of Honour leh Business Council of International Understanding-in Global Leader Award an pe a, kum 2021-ah Distiguished Friens of Singapore Public Service Star pek a ni bawk.