Covid-19 kai enkawl dan hmuh chhuah a la ni lo : WHO
World Health Organization (WHO) chuan Covid-19 kai enkawl dan leh a damdawi hmuhchhuah a la nih loh thu a tarlang.
Covid-19 damdawi leh a enkawl dante hriat chhuah a nih theih nan, hmun tam takah clinical trial neih mek a nih thu WHO chuan a tarlang. Heng trial neiha damdawi an hman leh enkawl dan an zirte bakah engtiang chiahin nge he hri hi mihringa a thawh dan te hrechiang turin la nghah a ngai dawn tih WHO chuan a tarlang bawk.
WHO chuan hri leng enkawl dam dan hi hriatchhuah vat a nih theih nan, 'Solidarity Trial' chu a kalpui mek a, he trial-ah hian theihtawpin mithiamte chuan he hri kai enkawl dam dan hi an zawng mek a ni, a ti. Hri kai mi 2,500 chuang chu he trial kaltlanga enkawlna pek mek an ni tih WHO Health Emergencies Program executive director, Michael Ryan chuan a sawi.
Damdawi hmanga phuhfaiin natna thlen thei
Khawlai, bazar leh hmun eng emaw bik damdawi (chlorine/chemical) hmanga phuhfai hian mihring mit, vun leh pum lamah natna a thlen phah theih zawk tih WHO chuan a sawi.
Covid-19 vanga hmun phuhfai ngai laite chu chlorine emaw chemical dang hmanga phuhfai ṭhin a ni a, mahse hetianga chemical hmanga phuh hian hri hi a tihhlum phah lo tih WHO chuan a tarlang a, hmun bal leh ṭawpah heng phuhfaina hi awmzia a awm loh thu a tarlang bawk.
Mihring taksa pawnah hian he hri hi engtia rei nge a dam theih tih chu hriatchian a la nih loh thu WHO chuan tarlangin, mithiamte chuan he hri hi mihring taksa pawn lamah ni tam tak a dam thei tih an tarlang tih a sawi.