Nunphung pangngaiah kan let leh ang - Donald Trump

US president Donald Trump chuan an rama Covid-19 vanga inhrekna leh inkhuahkhirhna hrang hrang kalpui a nih hnuah, inthlahdul chhoh zel a nih tur thu sawiin, America ram chu nunphung pangngaiah a let leh dawn, a ti.

White House-a Rose Garden-a chanchinthar thehdarhtute hmaah Trump chuan, Covid-19 in an ram chu nasa taka a run mek thu a sawi a, he hri tihdamna tur vaccine pawh US in hmuhchhuah a tum thu leh hemi kawngah hian US chuan theihtawpa hna a thawh mek thu a sawi bawk.

"He hri hi hun reilote atan chauh a awm dawn nge kan dam chhung min daih dawn tih chu tuman kan sawi thei rih lo a ni. Chuvang chuan he hri tihdamna tur vaccine hmuhchhuah hi a pawimawh hle a, US chuan he hri tihdamna tur hi a la hmuhchhuah ngei ka ring tlat a, kumin kum tawp lamah chuan an hmuhchhuah hman ka ring a ni," tiin Trump chuan sawi.

GlaxoSmithKline (GSK) vaccine head hlui Slaoui leh four-star Army general Gustave Perna chu US-in Covid-19 vaccine hmuhchhuah a tumna kawnga hotuah dah a nih dawn thu Trump chuan a sawi. He hri tihdamna tur vaccine chu hmuhchhuah vat a nih theih nan, Trump chuan 'Operation Warp Speed' kalpui a nih tur thu a sawi a, hemi atan hian an ram sipai, doctor leh scientist-te nasa taka an thawh ho thu Trump chuan sawiin, Indopui II-na hnua project lian ber a nih thu a sawi bawk.