Jordan-in Israel-Palestinian meeting a huaihawt

West Bank-a Israel leh Palestinian-te inbeihna thleng chho leh mek tihtawp a nih theih dan ngaihtuahin, nimin khan Jordan chuan Israel leh Pales­tinian official-te chu meeting a neihpui.

Meeting hi Red Sea port-ah neih a ni a, US leh Egypt aiawhte pawh an tel.

Israel sipaiten tun hnaia West Bank-a Nabus khua an beihnaah Palestinian mi 11 an thi a, hei hi kum 2005 hnua khawpui an beihnaa Palestinian mi thi an tam ber ṭum a ni.

Kuminah Israel leh Pales­tinian-te inbeihna thlengah Palestinian mi 62 leh Israeli 10 bakah, Ukraine khualzin pakhat an thi tawh. Hetih lai hian United Nations chuan kum 2006 hnuah nikum kha West Bank-a inbeihna thleng vanga thi an tam ber kum a ni tih sawiin, Israel sipaiten Palestinian mi 171 an that a, an zingah hian naupang 30 an tel niin a sawi.

Jordan sorkar official chuan nimina meeting an huaihawt chungchang hi sawiin, tun hnaia Israel sipaiten Palestinian-te laka beihpui an thlakte tihtawp a ni a, buaina nasa zawk chhuak thei tur venna tura an hmalakna a ni tih a sawi.

Kum tam tak chu Israel leh Palestinian aiawhte meeting hi buatsaih a ni tawh lo a, hetianga meeting neih an remti dun pawh hi hmasawnna lian tak a nih thu a sawi a ni.