France President-in China tlawh a tum

France president Emmanuel Macron chuan Russia-in Ukraine ram a run mek tihtawp a nih theihna atana China sorkar puihna ngen turin, April thla hian China a tlawh dawn tih a sawi.

China hian Inrinni liam ta khan thuchhuah siamin, kum khat chhung Russia-Ukraine inkara indona thleng tawh chu inremna siam dan ngaihtuah a, inkahhai puang turin a ngen a ni. Hemi hnu hian Macron chuan China sorkar hotute be turin April thla tirah China rama zin a tum thu a puang zui ve nghal a ni.

Macron chuan remna leh muanna a awm theihna tura China a rawn inrawlh hi thil lawmawm tak a ni tiin, Russia-in Ukraine a beihna a titawp a, a sipaite a hnuhdawh a, Ukraine ram thuneihna leh a mipuite chungah zahna a lantir hunah remna leh muanna hi a awm thei chauh ang, tiin a sawi zui. "Russia hian chemical emaw, nuclear ralthuam emaw a hman lohna turin China hian min nawrpui a ngai a ni," a ti.

China foreign ministry-in thuchhuah a siamah hian indona chu tumahin an hlawkpui ngai lo tia talrangin, Russia leh Ukraine-ten midang kaltlang loa inbiakna an neih theihna tura hma la turin ramdangte pawh a ngen a, khawthlang ramte chu Russia an hrekna pawh tihtawp turin a ti bawk. Russia ram ṭhianṭha tak leh, indona a thlen hnu pawha Russia lam thlawptua puh, China a rawn ṭawngchhuak hian ram dangte ngaihven pawh a hlawh nghal hle.

Ukraine president Volodymyr Zelenskyy pawhin China hmalakna chu lawmawm a tih thu sawiin, indona tihtawp a nih theihna atan China thawhpuina chu an mamawh thu a sawi ve nghal a ni.