Nikki Haley-i'n US hawtu ramte chhawmdawlna pek tihtawp vek tiam
US Republican party, Grand Old Party (GOP) presidential candidate Nikki Haley chuan US President-a thlan tlin a nih chuan, US hawtu ram leh pawl hnena chhawmdawlna pek ṭhin chu tihtawp vek a tiam.
"Ram dang, mi hawtute hnena foreign aid pek ṭhin chu a zavaiin ka titawp vek ang. America chuan kan mipuite thawhchhuah sum hi holam takin kan tiral mai mai dawn lo," tiin nikum chhung khan America chuan ram dangte puihna atan USD tld 46 vel a seng niin a sawi. "Chhiahpetu mipuite chuan an sum pek khawmte chu khawi hmunah nge pek a nih a, eng angin nge hman zui a nih hriat ve zel an phu a ni. Sum tam tak chu anti-American ramah pek a ni tih hria se chuan a ṭhawng ve hle ang," a ti.
Haley chuan President Biden-a hnuaiah chauh ni lo, a hmaa president ni tawhte hnuaiah pawh foreign aid policy kalpui dan chu a fuh tawk lo tih a sawi a, chhawmdawlna dawngtu ram chet dante chu an thli fim lo a ni, a ti. US ṭhianṭha, Israel leh Ukraine ramte an puih chu tihawm tak a nih laiin, an hmelmate rama chhawmdawlna pek chu thil awm lo tak a nih thu a sawi.