Covid-19 : Khawvelah hri kai mtd 4.73 awm

Khawvela hripui leng mek, Covid-19 kai chu mi 47,47,664 an awm tawh a, an zinga mi 3,13,633 in he hri hi an thihpui tawh a ni. Hri kai zinga mi 18,22,811 chu enkawl dam an ni tawh bawk. 

London police-te chuan hripui leng mek darh zel tur invenna kawng khat atana social distancing dan hman mek duh lohna lantir zinga mi 19-te chu Inrinni khan an man. 

Metropolitan police-te chuan London-a Hyde Park-ah sorkarin Covid-19 leng mek dona atana sorkar hmalakna chu duh lohna lantirin heng mite hi an awmkhawm tih sawiin, kal darh tura an ngen pawhin an thu an zawm duh lo tih an sawi. Ṭum eng emaw zat police-ten an ngen hnuah an zawm duh loh avangin mi 19-te hi man tih an sawi. 

Prime minister Boris Johnson chuan hri leng vanga an rama khuahkhirhna hman ṭhenkhatte chu thlahdul ṭanin, mipuite chu park-ah te an len leh inhmuhte phalsak an ni. Hemi rual hian mi tam tak punkhawm erawh khap zui a la ni a, park-a inhmu te pawh social distancing rule zawm tura tih an ni bawk. Mahse Inrinnia inhmukhawmte hian sorkar dan siam hi an zawm duh lo a, man an ni ta a ni. 

Russia ramah hri kai hi an la punbelh zel a, US dawtah hri kai tamna ber ram a ni tawh a ni.

 

Kar liam ta Inrinni khan hri kai hriat belh hi mi 9,709 awm lehin, Russia rama Covid-19  kai awm hi mi 2,81,752 an tling tawh. Inrinni vek khan mi 49 in he hri hi thihpuiin, coronavirus vanga thi hi mi 2,631 an tling tawh. 

Russia ram hruaitute chuan an rama hri kai zat pun chak chhan chu test an neih tam vang niin an sawi a, mi maktaduai ruk chuang Covid-19 test neih sak an ni tawh tih an sawi. Hri kai an tam viau chungin he hri vanga thi zat erawh chu ram dang nena khaikhinin a hniam hle niin an sawi bawk. 

Brazil chu Latin America ram zingah Covid-19 kai tamna ber a ni a, hri kai hi an la punbelh zel bawk. 

Health ministry chuan kar liamta Inrinni khan an ramah hri kai thar mi 15,000 chuang an awm tih a sawi. Hri kai hriat tawh zat hi 2,18,000 an awm tawh a, mi  15,046  in an thihpui tawh a ni. 

Ram chhunga hri dona kawnga hmalak dana president Jair Bolsonaro nena an duhdan a in an loh avanga health minister Nelson Mandetta a ban hnuah amah thlaktu atana ruat, Nelson Teich chu kar liam ta Zirtawpni khan a bang ve leh. 

President Bolsonaro hian hri darh tur venna atan social distancing leh lockdown kalpuite chu thlawp loin, heng dan hman duhtu health minister hlui Mandetta chu  na takin a lo sawisel tawh a ni. Mandetta ban hnuah a thlaktu, Teich chuan a ban chhan tak hi sawichiang lo mah se, President Bolsonaro thil kalpui danah a lawm lo hle tih a sawi. 

Hripui leng vanga thla hnih chuang biakin inkhawm khap a nih hnuin, nimin khan Greece chuan biakin te hawngin inkhawmna hunte an hmang leh thei ta.

Biakin te hawn ni mah se, inkhawma kalte chuan social distancing dan zawm tura tih an ni thung. Biakin chhunga ṭhutthlengte chu meter hnih danah hun niin, luhna turah kutkawr leh antiseptic-te chhawp a ni bawk. 

Greece-ah hian March thla laihawl aṭang khan lockdown kalpui a ni. Hri kai hi Pathianni thleng khan mi 2,819 awm tawhin mi 162 in an thihpui tawh a ni. 

Israel rama China ambassador, Du Wei chu Tel Avid khawdai, Herzliya-a a chenna inah nimin khan thiin hmuh a ni tih Israel police thupuangtu chuan a sawi. 

Kum 57 mi, Du Wei hi February thla khan Israel-ah ambassador-a dah a ni a, a hmain Ukraine-ah a lo awm tawh bawk. Nupui neiin fapa pakhat a nei a, a nupui leh fate hi Israel-ah an la awm ve lo. A thih chhan hi hriat a la ni lo a, chhui chian mek a ni.