Israel leh Palestinian-ten Buaina chhuak titawp tura hmalak remti

Israel leh Palestinian aiawhte chuan Jordan-a inbiakna an neih hnuah, buaina leh tharum thawhna thleng ṭhin titawp tura hmalak an remti.

Pathiannia Jordan sorkar hma­laknaa Red Sea resort, Aqaba-a inbiakna an neih hnuah Israel leh Palestinian official-te chuan thuchhuah inṭawm an siam a, buaina chhuak zel tur venna atan ṭha taka thawhdun an remtih thu an sawi.

Thuchhuah an siamah hian Israel pawhin thla li chhung Palestinian ram a luahah Juda-te chenna in tur sak belh chungchang sawiho tawh rih loh leh, in sak tharna tur pawh thla ruk chhung pawm belh tawh loh an remtih thu an tarlang.

Meeting-ah hian US, Egypt leh Jordan official-te pawh an tel a ni. White House national security adviser Jake Sullivan chuan US chuan he meeting hi bul ṭanna pawimawh takah a ngai tih sawiin, Israel leh Palestinian-ten hun lo kal zelah boruak ṭha an nei theihna turin tihtur tam tak an nei dawn a ni, a ti.

Israel leh Palestinian aiawhte hian March thlaah Sharm el-Sheik, Egypt-ah meeting neih leh an remti bawk.

Hetih lai hian Gaza Strip-a roreltu, Palestinian pawl Hamas chuan Jordan-a inbiakna neiha West Bank lama thuneitu, Palestinian Authority aiawh an tel chu an dem thu an sawi thung. Hamas group chuan meeting hi awmze nei lo a ni tiin, Israel leh Palestinian inkar boruak engmah a thlak danglam dawn chuang lo niin an sawi.