Italy-a lawng chesualah mi 59 an thi

Europe-a pem luh tumte phurtu, thinga siam lawng chu Italy chhim lam tuipuiah Pathianni khan a chesual a, mi 59 an thi. Thi zingah hian Pakistan mi 24 an tel.

Lawng hi Turkey aṭanga chhuak niin, Pakistan mite bakah Iran leh Afghanistan mite pawh an chuang a ni. Lawnga chuang zinga 81 chu chhanchhuah an ni a, an zingah 20 chu damdawi-in hruai an nih thu Italy thuneitute chuan an sawi. Lawnga chuang zinga pakhat chu human trafficking case-ah man a ni tih police-ten an sawi bawk.

Turkey hi mihring hmanga sumdawng ṭhinten Europe rama pem luh tumte hruai luhna kawng atana an hmang pui ber pakhat a ni. Tuipui aṭanga Europe luhpuina atan Italy hi landing point pakhat niin, heta aṭang hian Europe hmar lam ramte panpui an ni ṭhin. An kalna kawngte hi a hlauhawm leh, lawngte a ṭhat tawk loh ṭhin vangin tuipuia chetsualna pawh a thleng fo ṭhin. United Nations Missing Migrants Project chuan kum 2014 aṭang khan Europe lam pan tum, central Mediterranean-ah chesual leh chin hriat loha awm zui mi 17,000 an awm tawh tih sawiin, nikum bik khan lawng chetsualna vanga thi leh an chin hriat zui loh mi 220 an awm a ni, a ti.