Ni 945 hnuah Hong Kong-in mask vuahna thupek a sút

Hong Kong chuan Covid-19 hripui leng vanga pawn chhuaha hmai tuamna, face mask hmang vek tura thupek a tihchhuah chu ni 945 hnuah, vawiin aṭangin a sut ve dawn ta.

Hong Kong hruaitu, John Lee chuan nimin khan chanchinbu mite kawmin; outdoor, indoor leh public transport-a face mask vuahna thupek siam chu vawiin aṭangin tihtawp a ni dawn ta tih a sawi.

Covid-19 hri len hnua khuahkhirhna hrang hrang siamte avanga an ram sum dinhmun tlahniamte siamṭhatna turin, sorkar chuan khualzin tam zawk hip luh leh tumin hma a la chho mek a ni. Hong Kong hian tun thlaah international event lian tham tak tak a huaihawt chho leh dawn a, heng zingah hian music festival, Art Basel leh Rugby Sevens tournament-te a tel.

Hri leng vanga khuahkhirhna a siam tam zawk chu kumin kumtir lam a lo titawp tawh a, face mask hmanna thupek erawh hman chhunzawm a ni thung.

Pawn chhuahna face mask hmang vek tura thupek hi kum 2020, July 29 khan tihchhuah niin nimin thleng khan hman chhunzawm a ni. He thupek zawm lote chu HK$10,000 ($1,275) thleng chawitir theih an ni.