Nestle-in Myanmar-a factory leh head office khar dawn

Swiss food company lian, Nestle chuan Myanmar rama a factory leh head office a khar dawn tih a puang.

Kum hnih liam taa sipai chakna hmanga civil sorkar thuneihna paihthlak a nih hnuah, Myanmar ramah foreign company tam zawk chuan an office leh hmunhma te an khar tawh a ni. Nestle erawh chu an la awm zui zel a, mahse Thawhṭanni khan company thupuangtu chuan Myanmar rama an hnathawh zawng zawng an titawp dawn tih a puang ve leh ta a ni. Nestle Myanmar factory leh head office-ah hian thawktu mi 138 an awm a, an hnathawkte chhawmdawl dan tur pawh hi an ngaihtuah dawn tih an sawi a ni.

Sipaiten thuneihna an lak hnuah Myanmar ram aṭanga company lian inlachhuak zingah hian oil giant Total Energies leh Chevron, Norwegian telecom operator Telenor-te an tel.

Nestle thupuangtu chuan Myanmar ram economic dinhmun avangin, Yangon-a an factory leh head office chu khar a ni dawn tih a sawi a, khar a nih hun tur tak erawh a sawilang lo. Nestle hian Maynmar-a hian Nescafe instant coffee, Maggi noodles leh Milo chocolate malt beverage a hralhchhuak a ni. Myanmar rama an thil siamchhuahte an tihtawp hnuah Thailand, Malaysia leh Philippines aṭangin bungruate hi an thawn lut dawn thung tih a sawi nghal bawk.