Jeriko-a inbeihna thlengah Israeli-American a thi

Israel-in Palestinian ram a luah, West Bank-a Jeriko khuaa Palestinian miten an beihnaah Israeli-American motorist a thi.

Israel official-te chuan Thawhṭanni khan Palestinian mite hian Jeriko bulah kawngpuia tlante chu an lo kap a, an pawikhawihna thlenah hian Israeli-American hi a thi niin an sawi.

US pawhin Palestinian-te an kahhlum hi US citizen a nih thu a sawichiang tawh a, a hming erawh a tarlang lo.

He pawikhawina thlen hma hian West Bank-a Nablus bula Palestinian thingtlang khaw ṭhenkhat chu Juda miten an bei a, Palestinian mi pakhat an thah bakah, in leh motor eng emaw zat an halsak nia sawi a ni.

Tun hnaia Israel leh Palestinian mite inbeihna thleng leh fo avangin, Pathianni khan Jordan sorkar hmalaknain Israel leh Palestinian aiawhten meeting an nei a, pawikhawihna thleng ṭhin titawp tura hmalak an remti a ni.

Jordan foreign ministry chuan Israel lam hian Palestinian ram an luaha Juda-te chenna in sak pawh tihtawp rih an remti niin a sawi a, mahse hei hi Israel prime minister Benjamin Netanyahu chuan rawn pha nghalin, Juda-te chenna in sak chu tihtawp a ni dawn lo tih a sawi.