Greece-a khualzin phur leh bungraw phur rel insu ah mi 36 an thi

Greece ramah an ram huna Thawhlehni zan khan khualzin phur leh bungraw phur rel an insu a, mi 36 an thi a, mi dang 85 in hliam an tuar.

Rel insu hi Athens aṭanga Thessaloniki pan, khualzin phur leh Thesssaloniki aṭanga bungraw phur rel rawn chhuak an ni a, an insut hnu hian rel pindan ṭhenkhat chu a kang zui bawk.

Prime minister Kyriakos Mitsotakis chuan chetsualna thlenga thi chu ram pumah nimin aṭanga ṭanin ni thum chhung sunna hun hman a ni dawn tih a puang nghal a, sorkar building-a hnam puanzar pawh a ngul chanve-ah zar an ni. Ni thum chhung chu ram pumah intihhlimna lam buatsaih khap a ni. PM hian nimin khan chetsualna hmun hi a tlawh nghal bawk. Moldova rama zin mek, president Katerina Sakellaropoulou pawhin a cham hun titawiin, an ramah a haw nghal a ni.

Khualzin phur relah hian mi 350 an chuang a, an zinga 10 chu thawktu an ni. Bungraw phur relah hian mi pahnih an chuang bawk. Khualzin phur rel hian an ram huna Thawhlehni zan dar 7:30 vel khan Athens a chhuahsan a, zanlai rik hma hretah tunnel aṭanga a tlanchhuak chu Larissa khaw bul, Vale of Temple thlen hma lawkin an lam pana bungraw phur rel rawn tlan nen hian an insu ta a ni. Thessaly region governor, Konstantnos Agorastos chuan rel pahnihte hi an tlan chak avangin an insu na hle tih a sawi a, rel pindan hma lamte chu an chhe hneh hle a ni, a ti.

Hellenic train official chuan chetsualna thlen dan hi prosecutor leh police-ten an chhui zui nghal tih sawiin, Larissa-a station master chu hren phawt a nih thu a sawi. Chetsualna thlen hnu hian sorkar chuan emergency meeting a ko nghal bawk.