Nigeria President thar atan Tinubu thlang

Nigeria ram president thar thlannaah, rorellai All Progressives Congress candidate Bola Tinubu chu thlan tlin a ni.

Nimin zinga Independent National Electoral Commission (INEC)-in official result a tihchhuahah, kum 70 mi Tinubu hian vote tla aṭangin 37% a hmu a ni. A khingpui, Peoples Democratic Party (PDP) candidate Atiku Abubakar chuan 29% leh Labour Party candidate Peter Obi chuan 25% an hmu. Eptu party-te chuan kar liamta Inrinnia inthlanna neih hi felfai tawk lo leh, vote pawh tihchingpen nia sawiin result hi an pawm loh thu an sawi a, vote thlak ṭhat leh an phut.

President atana thlan, Tinubu hi Lagos state governor hlui a ni a, Nigeria rama politician hausa ber zinga mi a ni. A campaign au hlaah 'It's my turn' tih a hmang a ni.

President kalchhuak tur, Muhammadu Buhari chuan Tinubu chu lawmpuina hlanin, an ram President hna thawk tura mi ṭha ber a ni, a ti.