Russia-in sorkar official-te ramdang ṭawng hman a khap

Russia president Vladimir Putin-a'n February 28-a a hming ziah hnanna, an ram dan siamṭhatah sorkar official-te chu an duty-naah ramdang ṭawng hman khap an ni dawn.

Nikuma Ukraine an run hnuah khan, President Putin chuan khawthlang ramten kawng hrang hrang hmanga an ram tihchhiat an tumna lakah an ram venhim chu a tum tih a lo sawi tawh a ni.

2005 law siamṭhatte hi Russia ram venhimna leh a dinhmun chawisanna, Russia ṭawng humhalhna tura duan a ni tih sorkar website-ah an tarlang bawk. "Russian Federation-ah Russian chu state language a ni a, hei vang hian modern Russian kalphung ang ni loa ṭawng hmangte chu phal a ni lo. Hetih lai hian Russia-a a tlukpui tur sawina awm lo ṭawngkamte chu ngaihhnathiam a ni ang," tiin an tarlang.

Ramdang ṭawngkam, hmanzui phal turte chu a hranin an la tichhuak leh dawn a ni. Hemi rual hian dan siam zawm lote hremna tur erawh tarlan tel a ni lo.

Hetih lai hian Russia ṭawngah hian ṭawng dang, a bikin English, Turkish leh Greek lakluh a tam tawh hle a ni.