May 14-ah Turkey inthlanpui nei dawn

Turkey president Recep Tayyip Erdogan chuan May 14-ah President leh Parlia­ment inthlanpui neih a ni dawn tih a puang.

February thla tir lama lirnghingin chhiatna rapthlak tak a thlen avangin an ram dinhmun la ṭha lo hle mah se, President Erdogan chuan a hmaa an lo ruahman tawh angin May 14-a inthlanpui neih tur kaltlangpui tum a nih thu a sawi.

Turkey leh Syria rama February 6-a lirnghing na takin chhiatna a thlena thi hi mi 45,000 chuang an ni tawh a, a tam zawk hi Turkey rama mi an ni. Hei bakah hian building nuai hnih dawn a chhe bawk a, mi sing tel chenna nei loin an awm mek a ni.

Chhiatna thlen vang hian Turkey sorkar chuan May thlaa inthlanpui neih tum sawnhlat chungchang pawh an ngaihtuah a, mahse ruahman lawk anga kalpui a tum ta zawk a ni.

Erdogan chuan lir­nghinna bialah eng angin nge inthlan­na hi kalpui a nih dawn leh, hmun him lama sawnchhuah lirnghing tuartuten engtin nge an awmna aṭanga vote an thlak theih dan tur pawh a la sawilang lo.

President term hnihna hmang mek, Erdogan hi an ram sum dinhmun ṭha lo leh, thil man sang chak avangin mipuiteah a tla na lo chho ṭan tawh hle a, lirnging vanga chhiatna an tawhah sorkar hmalak dan pawhin sawisel a hlawh hle bawk.

Hei vang hian a term thumna atana a tlin leh theih dan ngaihtuahin inthlanpui neih hun tur pawh hi sawnhlat a duh lo nia rin a ni.