Sri Lanka-a Worker union-ten nawrh an huaihawt

Sri Lanka-a trade union 40 dawnin nimin khan sorkar laka lungawi lohna lantirin nawrh an huaihawt. Nawrh huaihawt zingah hian banking, public health leh ports sector lam pawh an tel a, hospital eng emaw zat khar a ni phah.

President Ranil Wickrem­esinghe-a kaihhruai sorkarin sum lama harsatna an tawh mek laia Internatinal Monetary Fund (IMF) aṭanga khaichhuahna tur an hmuh theihna atana an thil phut ang kalpui a, chhiah a tisang leh fund pekchhuah a titlem chu trade union hian an duh lo a ni. Sorkar chuan March 9-a local body election neih tur pawh fund a awm lo nia sawiin, a lo sawnhla tawh bawk.

Kar liam ta khan union hruaitute chuan chhiah tihsan chungchanga an lungawi loh thu hi President Wickremensinghe pawh an lo sawipui tawh a, mahse President chuan IMF puihna an mamawh dawn avangin an thil phut angte tlin a ngaih ve avangin income tax chu tihhniam theih a ni lo niin a lo hrilh a ni.

Sri Lanka hian kum 1948-a Britain lak aṭanga zalenna an hmuh hnua an ram sum dinhmun chhiat ber lai a tawng chho mek a, sum a neih loh leh leiba a ngah avangin an ram mamawh tam tak an lalut thei lo a, hemi rual hian ram chhunga thil man a sang chak hle a, thil man sanna 50% chuang a tling chho tawh.

Sum lama an harsatna tawh mek laka khaichhuah an nih theihna turin nikum khan IMF nen inremna siamin, IMF aṭanga puihna USD tld 29 an hmuh theihna tur hian sorkar chuan kumin aṭangin income tax chu 36%-a tisangin, power hman man pawh hmun thuma ṭhena hmun hnihin a tisang tawh bawk. Hetih lai hian chhiah tihsan leh thil man sang chak zel chuan mipui a nghawng nasa hle a, khawsak a harsa zual a ni. Hei vang hian income tax tihsanna hi sut leh turin sorkar an phut.